Den store badeguiden
Voss har så mange gode badeplassar som du kan nyta om sommaren (og resten av året, om du vil)! Her er våre utvalde tips til dei aller beste plassane.
NB! Elva forandrar seg frå dag til dag. Ta eigne vurderingar av korleis vatnet ser ut, kvar straumen går og kor fort den går. Ein må berre bada når vasstanden er låg - ikkje hopp uti om du er usikker. Ikkje bad aleine. Bading skjer på eige ansvar.
Vis omsyn til fastbuande, særleg med tanke på kvar du parkerer, søppel og do-besøk. Ikkje blokker ein vegstubb eller parker framfor traktor/bilen til den lokale bonden. Spør om lov ved parkering i tun/på private områder
Fjord, vatn og elv:
Voss er omringa av fleire vatn som kan koma opp i veldig god temperatur på sommaren! Perfekt for deg som ynskjer ein avslappande badetur i naturskjønne omgjevnader. I dei mange elvane som omkransar Voss har det forma seg jettegryter og kulpar som er veldig spennande å ta seg ein dukkert i. Her får ein kjenna på naturkreftene, og litt kaldare badetemperaturar enn i innsjøene.
Vangsvatnet
Om plassen:
Dette er utvilsamt den mest tilgjengelege badeplassen om du er på Voss - berre fem minutt å gå frå handlegata på Vangen. Lang badestrand, og flott friluftsområde med skog og stier like bak badestranda. Langgrunt dei fleste plassar, men ytterst på stranda er det fleire plassar ein ikkje treng å gå langt for å legge på svøm.
Korleis koma seg hit:
Køyr eller gå til fots til Voss Camping.
Granvinsfjorden
Om plassen:
I Granvin kjem du til fjorden. Du kan finne mange badeplassar langs fjorden, men i Granvin sentrum er det tilrettelagt med badestrand, brygge, leikeplass og grillplassar. Her får du nyedeleg utsikt og ein kjekk badeplass for store og små.
Korleis koma seg hit:
Køyr frå Voss Sentrum, på Hardangervegen, mot Granvin. Ta av mot Granvin, etter ca 25 km. Etter du har passert Coop butikken i Granvin sentrum, tek du av til venstre og følger vegen til høgre. Følg Eidesvegen ned mot fjorden til tilrettelagt parkering.
Oppheimsvatnet
Om plassen:
I Haugsvike finn du ein tilrettelagt badeplass med ei koselig lita strand. Plusspoeng for topp utsikt og flytande hoppetårn!
Korleis koma seg hit:
Med bil: Køyr frå Voss på E16 i retning Oslo. Etter kring ein halvtime (i 60-sona mot slutten av Oppheimsvatnet) kjem det skilt mot Vasstrondi til høgre. Ta inn her og fylg vegen nokre hundre meter bort til badestranda. Her finn du også nokre parkeringsplassar langs vegen.
Med buss: Ta buss nummer 950 eller 4500 til Haugsvik. Fylg beskrivelsen over og gå til badestranda til fots (kring 10 minutt).
Vetlavatnet
Om plassen:
Vetlavatnet er nesten alltid den varmaste innsjøen på Voss om sommaren. Her finn du ein koseleg liten badestrand, nokre svaberg ein kan liggja på, og ein benk. Nydeleg utsikt mot både Gråsida og Lønahorgi!
Korleis koma seg hit:
Med bil: Køyr frå Voss og mot Oslo på E16 til du kjem til Tvindefossen. Ta inn til høgre mot Nesheim og golfbanen og køyr kring ein kilometer. Når du har Hefte Gard (stort, kvitt hus) på venstresida tek du til høgre på ein veg som går inn til ein liten parkeringsplass. Fylg stien ned til vatnet.
Med buss: Ta buss nummer 950, 970 eller 4500 til Tvinno. Fylg vegbeskrivelsen over og gå til badestranda til fots (kring 20 minutt).
Valbergstjørni
Om plassen:
Nydeleg lite fjelllvatn ved Røde Kors-hytta på Hanguren. Her kan du kombinera fjelltur og badetur og gå akurat så langt som du vil. Frå Hangurstoppen finn du fotturar på alt frå 3 km til 16 km! Frå Hangurstoppen/toppstasjonen til Voss Gondol går det ei T-merka rundløype på 3 km rundt vatnet. Frå vatnet har du flott utsikt mot Lønahorgi! Her er det også tilrettelagt med badebrygge og livredningsbøye.
Korleis koma seg hit:
Ta gondolen til Hangurstoppen, eller gå til fots til Hangurstoppen frå Voss folkemuseum. Til fots må du rekna eit par timar opp. Frå toppen følger du skilta til merka rundløype på 3 km (Grebbesløypa). Denne stien tek deg bort til vatnet.
Demmo/Monsvatnet
Om plassen:
Flott badeplass like ved Flatlandsmo Camping som har noko for alle og ein kvar. Badetsranda med brygge like ved campinghyttene er midt i blinken for barnefamiliar. Fem minutt unna til fots finn du hoppetårnet, der dei tøffaste kan prøva seg frå både 7-meteren og 12-meteren. På andre sida av vatnet er det også laga til ei sklie. For å koma hit må du parkera ved industriområdet på Istadmyrane.
Korleis koma seg hit:
Med bil: Køyr på Rv13 frå Voss og mot Granvin i kring 15 minutt, til du ser skilt mot Flatlandsmo Camping. Parker på campingen (20 kr).
Med buss: Ta buss nummer 925 eller 990 til Flatlandsmo. Gå gjennom campingplassen og ned til badestranda.
Evangervatnet
Om plassen:
Evanger er ei sjarmerande lita bygd, kun 15 minutt med bil frå Voss. Og her er det sjølvsagt også eit vatn du kan bada i! Perfekt om du er på ei lita utflukt utanfor Voss sentrum. Evangervatnet har fleire badeplassar, og her har me valt ein liten badestrand på sørsida av vatnet.
Korleis koma seg hit:
Med bil: Køyr på E16 frå Voss og i retning Bergen i kring 20 km, til du kjem til Evanger. Ta til venstre mot Evanger stasjon frå E16. Køyr forbi stasjonen og fylg vegen vidare (parallelt med E16) i nokre hundre meter til du kjem til ei parkeringslomme på høgre hand. Her finn du ein liten badestrand nede med vatnet.
Med tog: Ta lokaltoget frå Voss mot Bergen, og gå av på Evanger. Fylg beskrivelsen over og gå til badeplassen til fots (kring 15 minutt).
Tangen, Bolstad
Om plassen:
Tangen friluftsområde på Bolstad har både volleyballbane, frisbeegolf, mini-ballbinge og ikkje minst badestrand.
Korleis koma seg hit:
Ta toget til Bolstad stasjon, frå Voss eller Bergen. Gå langs Naustvegen i retning vest (i motsatt retning av brua). Etter eit lite stykke deler vegen seg i to. Følg vegen som går oppover langs E16, før den svingar nedover mot fjorden att.
Bakka, Gudvangen
Om plassen:
På Bakka har Wild Sauna Norway opna ei nydeleg badstove, like ved kyrkja. Badstova ligg på brygga og like ved ei lite strand - her kan du både hoppa i fjorden eller gå roleg uti.
Korleis komma seg hit:
Følg E16 mot Oslo, heilt til Gudvangen (ca 50 min). Like før du kjem til Gudvangen og Vikingelandsbyen tek du av mot Bakka, på Fv241. Køyr ca 10 min mot Bakka, til du kjem til kyrkja. Gå langs vegen ned mot fjorden, her vil du sjå badstova.
Bordalsgjelet
Om plassen:
På nedsida av brua ved den populære turistattraksjonen Bordalsgjelet er det ein kulp som egnar seg fint for bading om vasstanden er låg. Denne badeplassen er for dei aller tøffaste, som har lyst på ein skikkeleg fin naturoppleving i friskt og kaldt vatn.
Korleis koma seg dit:
Badeplassen ligg på nedsida av bilvegen, til høgre før du kjem til brua som går over Bordalsgjelet. Her går det ein tilrettelag sti ned til eit lite utsiktspunkt. Til høgre for dette utsiktspunktet kan ein klyva ned til kulpen. Kun for dei sprekaste!
Smilekulpen, Mjølfjell
Om plassen:
Smilekulpen er ein nydeleg kulp i Raundalselva, med krystallklart vatn og lett tilgjengeleg frå vegen. Ved låg vassføring kan ein også klatra litt oppover elva, under brua. Me anbefalar å ta ei overnatting på Kårdal Fjellstove slik at du får god tid til å utforske område. Mjølfjell er eit svært fint område med mange tur og bademoglegheiter. Er du usikker på kvar du skal begynne - ta kontakt med Wild Voss for å få eigen guide med på turen.
Korleis koma seg dit:
Med tog: Ta toget frå Voss til Ljosandbotn. Gå nedover bilvegen til du kjem til ein større parkeringsplass. Smilekulpen ligg til høgre, rett nedandfor brua. Dette er det klart beste alternativet, då bilvegen hit er smal og ganske dårleg.
Bil: Køyr oppover Raundalsvegen mot Mjølfjell. Følg Raundalsvegen og Kleivavegen i kring 30 km. Når du kjem til ein stor parkeringsplass på venstre sida av vegen (der turstiane mot Ljosandalen startar) er du framme. Kulpen er på nedsida av vegen, under brua du nettopp har køyrd forbi.
